Lo presonièr d’ETA Iosu Uribetxebarria, intrat dins l’espital de Sant Sebastian per un càncer terminal, decidiguèt ièr d’abandonar la cauma de la fam que teniá dempuèi quinze jorns per demandar l’excarceracion, segon çò qu’a confirmat Herrira, lo collectiu de sosten als presonièrs.

Uribetxebarria a quitat la cauma de la fam perque es extrèmament afeblit e “per priorizar la vida”. Los quinze jorns de cauma an deteriorat lo sieu estat de santat, una possibilitat que n’èra fòrça conscient quand comencèt la cauma en las siás circonstàncias, amb un càncer terminal.
 
Lo Secretariat General de las Institucions Penitenciàrias li concediguèt divendres lo tresen gra (qualques oras de libertat per jorn). S’agís d’un passatge prèvi a la libertat condicionala que l’Audiéncia Espanhòla decidirà per el dins los jorns venents.
 
La cauma de la fam que comencèt fa quinze jorns, foguèt segondada posteriorament per mai de dos cents presonièrs politics bascos, que demest eles i aviá Arnaldo Otegi. Totes aqueles an començat d’anonciar que quitan tanplan la protèsta.